رجعت من السفرية
الظابط قاطعها
محدش بيعلي صوته على حد. إحنا بنسأل سؤال واضح البنت فين؟
مرات أخو جوزي اتحركت في مكانها بتوتر وقالت
هي… يعني… في مصنع ملابس.
بصيتلها بسرعة
مصنع إيه؟
سكتت.
اسمه إيه؟!
قالت وهي بتتلعثم
والله ما أعرف اسمه.
أخو جوزي زعق فيها
اسكتي إنتِ!
وهنا الظابط بصله.
ليه تسكت؟ خليها تتكلم.
بدأت أحس إن رجلي مش شايلاني.
قلت
أنا مش هسأل تاني. بنتي فين؟
وفجأة…
مرات أخو جوزي قالت جملة خلت الدم يتجمد في عروقي
إحنا ما وديناهاش بنفسنا.
بصيتلها.
يعني إيه؟
حماتي صرخت
قلتلك اسكتي!
لكن الظابط وقف بينها وبين مرات ابنها وقال
كملي.
مرات أخو جوزي قالت بخوف
ماما كلمت واحد اسمه فتحي… هو اللي جه خد ملك.
صرخت
مين فتحي؟!
قالت
واحد من بلدنا بيجيب بنات يشتغلوا في مصانع في المنطقة الصناعية.
حسيت إني مش سامعة باقي الكلام.
واحد بيجيب بنات؟
وبنتي القاصر سلموها لراجل معرفوش؟
قلت وأنا حرفيًا بترعش
عنوان المصنع فين؟
ردت
معرفش.
في اللحظة دي، حماتي حاولت تدافع عن نفسها
يا جماعة ما تكبروش الموضوع! فتحي راجل معروف، وكل بنات البلد بيروحوا معاه!
بصيتلها بعدم تصديق.
حضرتك سلمتي بنتي لراجل… ومتعرفيش حتى المصنع اللي خدها عليه؟
ردت
هو قال إنها هتاخد مرتب كويس!
وهنا سألتها
مرتب؟
سكتت.
قربت منها خطوة.
مين هياخد مرتب ملك؟
ما ردتش.
لكن نظرتها راحت ناحية أخو جوزي.
وهنا فهمت.
بصيتله.
الفلوس كانت لمين؟
قال بسرعة
إنتِ فاهمة غلط.
بسألك سؤال… الفلوس كانت لمين؟
الظابط طلب منه يجاوب.
وبعد ضغط، مرات أخو جوزي
هي اللي قالت
كان فيه مقدم.
اتسمرت.
مقدم إيه؟
قالت بصوت منخفض
فتحي دفع لماما 12 ألف جنيه مقدم مقابل إن ملك تشتغل عندهم طول الإجازة.
ثواني…
ماقدرتش أتكلم.
بصيت لحماتي.
إنتِ… أخدتي فلوس مقابل شغل بنتي؟
قالت بسرعة
وهيروحوا لمين يعني؟ للعيلة!
ضحكت.
لكن المرة دي ضحكتي كانت من الصدمة.
عشان ابنك ومراته وابنهم يقعدوا في أوضة بنتي… بعتي بنتي تشتغل، وأخدتي مقدم مرتبها؟
حماتي ردت بمنتهى الثقة
ما هو حفيدي محتاج مصاريف!
ساعتها حتى أفراد الشرطة بصوا لبعض.
قلت للظابط
أنا عايزة بنتي دلوقتي.
بدأوا ياخدوا البيانات ورقم الراجل.
ولما حماتي رفضت في الأول تديهم رقم فتحي، الظابط قال لها بوضوح إن إخفاء مكان قاصر في الظروف دي مش حاجة بسيطة.